​អាហាររូបត្ថម្ភនៅក្នុងគ្រាប់ស្វាយចន្ទី

គ្រាប់ស្វាយចន្ទីមានសារធាតុចិញ្ចឹមច្រើននិងជាប្រភពថាមពលនៃប្រូតេអ៊ីននិងសារធាតុរ៉ែចាំបាច់ដូចជា ទង់ដែង  កាល់ស្យូម ម៉ាញេស្យូម ដែក ផូស្វ័រ ប៉ូតាស្យូម និងស័ង្កសី។ គ្រាប់ស្វាយចន្ទីក៏មានវីតាមីនដូចជាវីតាមីន C, វីតាមីន B1 (thiamin), វីតាមីន B2 (riboflavin), វីតាមីន B3 (Niacin), វីតាមីន B6, ហ្វូឡាត, វីតាមីនE (alpha -tocopherol) និងវីតាមីន K (phylloquinone) ។

អត្ថប្រយោជន៍ចំពោះសុខភាពបានពីគ្រាប់ស្វាយចន្ទី

​បង្ការជំងឺបេះដូង

គ្រាប់ស្វាយចន្ទីគឺជាប្រភពដ៏ល្អនៃខ្លាញ់ដែលផ្តល់នូវសុខភាពល្អ ដែលមានសារៈសំខាន់សម្រាប់រាងកាយយើងក្នុងការបឺតស្រូបយក​​វីតាមីន A, D, E និងវីតាមីន K និងផលិត​អាស៊ីត​ខ្លាញ់ដែលមានសារៈសំខាន់សម្រាប់ការវិវឌ្ឍខួរក្បាលនិងឈាមកក។ ខ្លាញ់ផ្តល់​សុខភាពល្អ ​វាល្អសម្រាប់បេះដូងនិងជួយកាត់បន្ថយកូលេស្តេរ៉ូលអាក្រក់ ​LDL ​ប្រសិនបើពិសារក្នុងបរិមាណសមរម្យ។

ជំនួយសុខភាពសាច់ដុំ  & សរសៃប្រសាទ

ម៉ាញ៉េស្យូមនៅក្នុងគ្រាប់ស្វាយចន្ទី ជួយដល់ការលូតលាស់របស់ឆ្អឹង សាច់ដុំ ជាលិកា និងសរីរាង្គនៃរាងកាយ។ ម៉ាញ៉េស្យូម ជួយរក្សាសំពាធឈាម បង្កើនប្រព័ន្ធភាពស៊ាំ ថែរក្សាមុខងារសរសៃប្រសាទ និងរក្សាឆ្អឹងឱ្យរឹងមាំ។

កាត់បន្ថយហានិភ័យនៃជំងឺទឹកនោមផ្អែម

វត្តមាននៃជាតិស្ករដ៏តិចតួច​និងគ្មានកូលេស្តេរ៉ូលអាក្រក់ក្នុងគ្រាប់ស្វាយចន្ទី ​មានសុវត្ថិភាពសម្រាប់អ្នកជំងឺទឹកនោមផ្អែម។ វា ក៏ជួយក្នុងការកាត់បន្ថយហានិភ័យនៃជំងឺទឹកនោមផ្អែមប្រភេទទី 2 ផងដែរ។

ភ្នាក់ងារបង្ការជំងឺមហារីក​  Cancer Chemopreventive Agent

ការស្រាវជ្រាវបានបង្ហាញថា ភាពសម្បូរបែបនៃសារធាតុប្រឆាំងអុកស៊ីតកម្ម ដូចជាអាស៊ីតអាណាកាឌិក  ​កាដាណុល និងកាដុល នៅក្នុងគ្រាប់ស្វាយចន្ទី ធ្វើឱ្យវាមានប្រសិទ្ធភាពសម្រាប់មនុស្សដែលកំពុងព្យាបាលជំងឺដុះសាច់​និងមហារីក។ គ្រាប់ស្វាយចន្ទីគឺជាប្រភេទប្រូតេអ៊ីនស្រូបយកធម្មតានិងមានសុវត្ថិភាពសម្រាប់អ្នកជំងឺផងដែរ។

ជម្រុញការបង្កើតកោសិកាឈាមក្រហម

គ្រាប់ស្វាយចន្ទីសម្បូរទៅដោយទង់ដែង ដែលជួយក្នុងការបំប្លែង​ជាតិដែក ជួយដល់ការបង្កើតកោសិកាឈាមក្រហម ​និងជួយរក្សាឆ្អឹងនិងប្រព័ន្ធភាពស៊ាំអោយមានសុខភាពល្អ។ វាក៏សំខាន់ផងដែរ សម្រាប់ប្រព័ន្ធសរសៃប្រសាទនិងឆ្អឹងនៃរាងកាយ។ កង្វះទង់ដែងនៅក្នុងខ្លួនមនុស្សអាចបណ្តាលអោយមានជំងឺពុកឆ្អឹង  ចង្វាក់បេះដូងលោតមិនទៀងទាត់និងជំងឺស្លេកស្លាំងខ្វះឈាមក្រហម។

បំប៉នឆ្អឹងនិងសុខភាពមាត់ធ្មេញ

ស្វាយចន្ទីផ្តល់នូវផូស្វ័រ ដែលចាំបាច់សម្រាប់ការវិវឌ្ឍធ្មេញនិងឆ្អឹងអោយមានសុខភាពល្អ។ ផូស្វ័រក៏ជួយដល់ការសំយោគប្រូតេអ៊ីន ការស្រូបយកកាបូអ៊ីដ្រាតនិងខ្លាញ់ និងការថែទាំសុខភាពកោសិកាផងដែរ។

កាត់បន្ថយហានិភ័យនៃភាពស្លេកស្លាំង

ស្វាយចន្ទីគឺជាប្រភពនៃជាតិដែកដែលមានសារសំខាន់សម្រាប់នាំយកអុកស៊ីហ្សែនទៅកាន់ជុំវិញរាងកាយ និងជួយដល់ដំណើរការ​អង់ស៊ីមនិងប្រព័ន្ធភាពស៊ាំ។ កង្វះជាតិដែកនៅក្នុងរបបអាហារ អាចនាំឱ្យអស់កម្លាំង ភាពស្លេកស្លាំង និង​ងាយកើនឡើង​នៃភ្នាក់ងារបង្ករោគ។

ការពារក្រួសក្នុងថង់ទឹកប្រមាត់

ក្រួសក្នុងប្រមាត់ គឺ​​ដូចជាការមានដុំថ្មនៅក្នុងនោះ ដែលជាធម្មតាមានកូឡេស្តេរ៉ូលដែលប្រមូលផ្តុំនៅក្នុងថង់ទឹកប្រមាត់។ ​ស្វាយចន្ទីអាចជួយកាត់បន្ថយហានិភ័យនៃការបង្កើតក្រួសក្នុងប្រមាត់បាន។

បង្កើនប្រព័ន្ធភាពស៊ាំ

គ្រាប់ស្វាយចន្ទីមានផ្ទុកជាតិស័ង្កសី ដែលដើរតួយ៉ាងសំខាន់ក្នុងការពង្រឹងប្រព័ន្ធភាពស៊ាំ ប្រឆាំងនឹងការឆ្លងមេរោគមីក្រុប ការសំយោគប្រូតេអ៊ីននិងការព្យាបាលរបួស។ ផ្លែស្វាយចន្ទី ​មានលក្ខណៈសម្បត្តិប្រឆាំងនឹងបាក់តេរីហើយ​មានប្រសិទ្ធភាពក្នុងការព្យាបាលជំងឺដំបៅក្រពះនិងរលាកក្រពះ ដែលជាធម្មតាបណ្តាលមកពីបាក់តេរី  ។

ផលប៉ះពាល់នៃគ្រាប់ស្វាយចន្ទី

ក្រួសក្នុងតម្រងនោម ៖ គ្រាប់ស្វាយចន្ទីមានផ្ទុកអំបិលអូសាឡែត ដែលរំខានដល់ការបឺតស្រូបយកកាល់ស្យូមនៅក្នុងខ្លួន។ ​ដូចនេះ ចូរ​ពិចារណា ញ៉ាំគ្រាប់ស្វាយចន្ទីក្នុងបរិមាណតិចតួច។

អាឡាក់ហ្សីស្វាយចន្ទី៖ ការពិសារគ្រាប់ស្វាយចន្ទីអាចបណ្តាលឱ្យមានគ្រោះថ្នាក់ដល់សុខភាពចំពោះអ្នកដែលមានប្រតិកម្មទៅនឹងគ្រាប់ផ្លែឈើ។ ​គួរតែពិគ្រោះជាមួយវេជ្ជបណ្ឌិត ប្រសិនបើលោកអ្នកកើតមានអាឡែរហ្សីបន្ទាប់ពីពិសាគ្រាប់ស្វាយចន្ទី។

ជំងឺរលាកស្បែក៖ ជំងឺរលាកស្បែក គឺស្បែករមាស់បណ្តាលមកពី​ស្បែកកើតមានអាឡែរហ្សី កន្ទួលនិងហើម អាចមាននៅជុំវិញមាត់ឬផ្នែកផ្សេងទៀត​។ ​

បញ្ហាក្រពះពោះវៀន៖ ​អ្នកខ្លះ ធ្លាប់មានអាការៈរកកល់ចង់ក្អួតចង្អោរ រាគ និងចុកពោះ ក្អក ក្អួត ប្រសិនបើពួកគេមានប្រតិកម្មទៅនឹងគ្រាប់ស្វាយចន្ទី។

ការពិបាកដកដង្ហើម៖ ការហៀរសំបោរ ក្អក និងដង្ហើមខ្លីៗ ជាញឹកញាប់ អាចធ្លាប់​កើតមាន។ ប្រតិកម្មខ្លាំងអាចបណ្តាលឱ្យមានស្ថានភាពធ្ងន់ធ្ងរដូចជាជម្ងឺហើមបំពង់ក ឬមានប្រតិកម្មអាណាហ្វីឡាក់ទិចជាដើម។ ប្រតិកម្មអាណាហ្វីឡាក់ទិច ​គឺជាប្រតិកម្មអាឡែរហ្សីវិវឌ្ឍឆាប់រហ័សដែលអាចកើតឡើងចំពោះរាងកាយទាំងមូលដោយសារសារធាតុឬសារធាតុគីមីមួយចំនួនដែលរាងកាយបានបង្កើតនូវភាពប្រែប្រួល។ ​តាមការស្រាវជ្រាវជាច្រើន គ្រាប់ស្វាយចន្ទីអាចបង្កគ្រោះថ្នាក់ខ្ពស់នៃ​ប្រតិកម្មអាណាហ្វីឡាក់ទិច។ វាអាចបណ្តាលឱ្យមានរោគសញ្ញាដូចជាដកដង្ហើមឮៗ ​សន្លប់ រូបកាយស្លេកស្លាំង ហើមអណ្តាតឬបំពង់កនិង សម្លេងស្អក ។ ការប្រតិកម្មអាណាហ្វីឡាក់ទិច ត្រូវការសង្គ្រោះបន្ទាន់ផ្នែកវេជ្ជសាស្រ្ត ហើយគួរត្រូវបាន​យកចិត្តទុកដាក់បំផុត។